webloggi

Unioqqutitsilluni taasinermi eqqortoq oqimaqatigiisinniarneqarsinnaanngilaq.

KNR tusagassiortut Inatsisartuni ilaasortat ataasiakaat malersorsinnaanngilaat aamma taamaasiorsinnaatitaanngillat. Tusagassiortulli pisussaapput demokratip aqqani nakkutiginnissallutik inatsisartut nammineq aaliangersakkatik malinneraat.

Demokratiimut toqqammiviusut inatsisartup nammineerluni isumaa isummersorneraluunniit naapertorlugu oqimaalutarniarneqarsinnaanngilaq. Suna eqqornersoq eqqunnginnersorluunniit unioqqutitsilluni taasissussisimanermi nalilerniarsarineqarpat taava aatsaat nakkutilliiniarneq pisariaqarnerulersimassaaq. Unioqqutitsilluni taasinermi eqqortoq oqimaqatigiisinniarneqarsinnaanngilaq. Aamma Inatsisartut siulittaasuanniit. 

KNR-ip pisussaaffigaa inuiaqatigiit eqqortumik paasissusiinissaq, inuiaqatigiillu nammineerlutik naliliiniarnerminni ilisimasariaqagaannik pilersussallugit. KNR-ip nutaarsiassaqartitsiviata tassani pisussaaffik pingaaruteqarluinnartoq tigummivaa - aamma inatsisartut qanoq sulinerannut tunngatillugu.

in.

Larsi     

Taamaatinniarlunga aalajangerpunga allanik misilittagaqarusullunga

Misilittakkanut allanut ikaarsaarumallunga uninniarlunga aalajangerpunga. Ukiut arfinillit KNR-imi pisortaanera uannut inuttut nuannerlutillu pissarsiffiulluarsimaqaat, ammali uannut piumaffiginnissimaqalutik unamminartuusimaqalutillu. Aallakaatitassiornermi nutaarsiassiinermilu atukkat pissutsillu aningaasaqarniarnermut sanilliullugit oqitsuinnaasimanngillat, KNR-mut sinaakkiunneqartartut piumasaqaatillu erqaassagaanni. Periarfissarpassuugaluarpummi atorluarneqarsinnaagaluartut uggornartumik piviusunngortinneqarsinnaasimanngitsut, aningaasaqarnikkut atugassarititaasut peqqutigalugit. 

 

Naak suliffik pisortaaffigisaq qimaligaq unganassagaluaqisoq ukiunilu arfinilinni pisortat - sulisullu - qanimut ilisarisimaqatigiilereerlugit, manna aalajangerpunga sulianut nutaanut ikaarsaarniarlunga. Tamannalu aamma qilanaaraara. KNR-mi siulersuisut suleqatigilluarsimavakka ikaarsaarnermilu sapinngisamik pitsaasumik pinissaanut suleqataassaanga.      

 

Ukiut arfinillit ingerlanerani pisortaaninni makku annertunerit ineriartornermi aallakaatitsinermi aallakaatitassiornermilu unganeqarsimasut erqaaneqarsinnapput: 

 

• Sulisut radiop illorsuaniit tv-ip illorsuanut ataatsimoortinneqarsimapput.
• Avannaata Kujatatalu Radioi nutaanut ullutsinnut naleqqunnerusunut nuussimapput.
• KNR-mi radiomi tv-milu atortut nutarterlugit digitaliseererneqarsimapput.
• Nuannarineqaqqisoq unnuap radioa aallartissimavoq.
• KNR-miit Naalakkersuisunik isumaqatigiissut (public service kontrakt) allartinneqarsimavoq.
• Radiukkut aallakaatitsineq 2003-mi 6.000 tiiminiit 2007-mi 8.300 tiiminut qaffassimavoq.
• Radiomi ukiup ingerlanerani nutaanik aallakaatitassiorneq 2003-mi 1.951 tiiminiit 2007-mi 2.500 tiiminut qaffassimavoq.
• Tv-mi ukiup ingerlanerani nutaanik allakaatitassiorneq 2003-mi 248 tiiminiit 2007-mi 279 tiiminut qaffassimavoq. 
• Sinerissamiit lokal radio tv-qarfinniit ilanngutassiat aallakaatitassiallu pisiat marloriaatinngupajaarsimapput 2003-mi 800 t.kr.-niit 2007-mi 1.500 t.kr.-nut.
• Sulisut 2003-miit 2007-mut 111-niit 106-nut appariarsimapput (appariaat -4,7%).
• Ukiut taakku ingerlanerani (2003-2007) nutaanik aallakaatitassiorneq ataatsimut isigalugu 2.199 tiiminiit 2.838 tiiminut qaffariarsimapput (qaffariaat + 22,5%).

Inussiarnersumik

Larsi

KNR kalaallisullu oqaatsigut.

Kalaallisut oqaatsigut qitiulluinnarsimapput KNR radiop pilersinneqarneranut. Oqaatsigummi kinaasusitsinnut immitsinnullu inuiaqatigiittut isiginitsinnut erqarsariartaatsitsinnullu tunngaviupput sanillersuunneqarsinnaanngitsumik. Nunarsuaq kalaallisut oqaaseqanngitsoq piitsuunerungaassaaq.

Angerlarsimaffitsinni kalaaliussutsitta tarnittalu aallaaveqarfigisaani nunarsuarmioqataarusuppugut, nukittuumik kikkunnik tamanik kiffartuussiveqarlunilu qaammarsaavilimmi, ataqqinaateqarluartunik ilinniarluarsimasunik tusagassiortoqarfiusumi, sutigullu ileqqorissaarnissatigut iliuutsinik - tassa erqortuliornissannik erqunngitsuliornermillu - uannut najoqqutassiuisinnaasumik oqaloqatigiissutaasinnaasunik periarfissiisumi.

KNR qujaffigisariaqarpoq kalaallisut oqaatsigut ullutsinni atammata, atorluarneqarmata ineriartortinneqarlutik, nunatsinnilu tamarmiusumi paasineqarsinnaalluni.

Larsi 

KNR ukiuni 50-ni - uppernanngiusartumik siuariarneq annertooq.

KNR-ip pilersinneqarneranut atatillugu, nunalu tamakkerlugu naalaarneqarsinnaasumik allakaatitassiornerup aallakaatitsisalernerullu ukiut 50-it matuma siornatigut aallartisarneqartoq erqarsaatigigaangakku, erqarsatiginngitsoortanngilara qanoq tupinnaannartumik uppernanngiusartigisumillu inuiaqatigiinnut siuariaataatigisimanissaa. Siuariarnerummi nunatsinni inuiaqatigiit sumiikkaluarunilluunniit kikkuugaluarunilluunniillu, ataatsikkut ilisimasassanik qaammarsagaanermillu periarfissinneqarsimapput, taassumalu saniatigut inuttut inuiaqatigiittullu aporfiusinnaasunik, qanorlu taakku qaangerneqarsinnaanerannik takorluuilersitsisinnaasumik, periarfissinneqarsimammata. Taamatut siuariarneq ullutsinni erlinnarnerpaat erianarnerpaallu ilagaat.

KNR inuit assigiinngitsorpassuarnik soqutigisallit, tunuliaqutillit, ilisimasallillu, paasissutissatigut ataatsimoorfigiuarsimavaat taamaattuassallunilu. KNR-ip sullissinera, aallakaatitassiatigut ataasiakkatigut kisimi attanneqarsinnaanngitsoq, attanneqartuassaaq uummatinneqartuassallunilu kinguaariinnit imminnut attaveqaqatigiikkuutaanit annertuumik soqutigisatigut tunuliaqutaqartuniit. Attaveqaqatigiit ataasiinnarmik siunertallit: inuiaqatigiit kalaallit siuarsassallugit kiffartuusseqataaffigissallugillu.

KNR inuiaqatigiillu kalaallit - ukiuni 50-ni pilluarit!

Larsi               

Qapuk ingerlaqqilli!

Isumaqarpunga Qapuk ingerlaqqittariaqaraluartoq uniinnarani. Qapuk iluatsilluartutut nalilertariaqarpoq. Pilersaarutaasimagaluarpoq suli annertunerusumik sinerissamiit avinngarusimanerusuniillu - soorlu nunaqarfinniit aamma - kulturikkut, erqumiitsuliornernitsigut, erinarsornertigut, allatigullu takutitsinertigut peqataarusuttut ilanngunneqarnissaat. Tamannali periarfissinneqanngitsoorpoq annertunerusumik aningaasat angalaniarnerlu aporfiullutik.

Taamaakkaluartorli QAPUK-p allakaatitassiarineratigut iluatinnartorujussuarmik inuppassuit peqataanerisigut aallartittoqarpoq. Isiginnaartartut peqataatinneqarnerat, isiginnaartitsisartut, quiasaarisartut, nipilersortartut, minnerunngitsumillu erqumiitsuliortut allarpassuillu inuinnaat immikkut tamarmik isummersortinneqartut ersersippaat, nunatsinni kulturikkut anersaatigullu immitsinnut tunniussassaqaraluaqisugut nukitsorsarfissatsinnik. Qanga qangarsuarlu pisimasut, siunissamilu pisussat pisussatullu takorluukkat, uteqattaaginnarnagit 'massakkumili' pisut aamma isummersorfigineqarmata arfiningormat tv-kut Qapuk toqqaannarmat, takusat, tusaasat, misigisallu nuaneqaat pisuunnguallannaqalutillu. Erinarsortut, nipilersortut, qalipaasut, immikkullu oqaaseqartinneqartut oqariartuutaat imartoorujusuupput.

Toqqaannarnerit taamattut misigisitsilersarput maani nunatsinni massakkut inuunitsinnik qanoq paasisariaqarneranik, sumullu killinnersugut inuttut ineriartornitsinni, imaanngitsoq takorluukkersaaginnarnata aamma pisimasut erqarsatigeqattaaginnaqinagit. Naamik - massakkumi inuuvugut 'ippassaanngitsoq' aamma 'aqaguunngitsoq'. Massakkumi qanilaarnermik sinerissamilu inoqatigut ilisarinerorusuppagut siunertalimmillu anersaakkullu erqissiffilimmik.

Uanga nammineerlunga arfininngormat studiami Qapuk toqqaannarmat najuukkama, inuk kalaaleqatiga nalunngikannereeraluarlugu ataqqinartoq erqumiitsuliortoq 'Kunngi' aatsaat qanimut assammillugu ilassivara. Misigisaq nuanneq qamuunalu pisuunnguallannaq. Soorlu piffissaq tamarmi unittoq - ipassaqanngilaq, aqagoqaranilu. Tassa pisut misigisat nuannersut ilaat Qapuk aallaaviulluni. Qapuk qujanaq! - ilungersuutigissarvarput siunissami ukiut tamaasa ingerlaqqinnissaa.

In.

Larsi         

KNR allatigut aamma atorneqarsinnaava?

Aap. KNR namminersornerullutik oqartussaniit atorluarneruneqarsinnaalluarpoq, suliniutinut imaluunniit anguniakkanut arlaatigut peqquteqartumik 'ikkarleqqasunut'. Soorunami suliniutinut KNR-ip siunertaanut naleqquttut uani pineqassapput. Tassanilu erqarsaatigilluarneqarsinnaapput ilinniartitaanerup peqqinnissaqarnerullu iluani inuiaqatigiinnik qaammarsaaneq. Taakkuinnaalluunniit erqarsaatigalugit aningaasarpassuarnik namminersornerullutik oqartussat iluanni sipaartoqarsinnaagunavippoq.

Ilinniartitaaneq.

Annertoorujussuarmik sinerissami ilinniartitsisussaaleqisoqarpoq. Illoqarfinni nunaqarfinnilu ilinniartitsisut ilinniarsimasut KANUKOKA-p 2000-mi naatsorsuinera naapertorlugu 40-50% amigaataapput. Illoqarfinni 69-75% missaani taamaallaat ilinniartitsisut ilinniarsimasuupput. KNR-ip tamanna annertoorujussuarmik peqataffigisinnaagaluarpaa ikiorsingaatsiarlugulu, radio, tv internet-lilu aqqutigalugit nuna tamakkerlugu ilinniartitsinikkut. Soorlu ullaap tungaani kalaallisut aamma matematik ingerlanneqarsinnagaluarpoq klassinut aaliangersimasunut aqqissuussamik naleqqussakkamillu. KNR taamaasiornermigut ilinniarnerup ineriartornera ilinniartitsisunillu atuarfinni ataasiakkaani peqataaffigineqartoq, akuuffigilissagaluarpaa pitsaasumik angusaqarfiulluartumillu.

Peqqinnissaq /qaammarsaaneq.

Atuarfimmisuulli peqqinnissaqarfiup iluani illoqarfinni nunaqarfinnilu inuttassaaleqineq tusarsaajuarpoq. KNR-ip atorluarneratigut innuttaasut sukumiinerusumik pissarsiffiulluartumillu peqqinnissap, nappatit kigutigissaanerullu iluani paasissusiisalisagaluarpoq.

Ilimagilluinnarpara aallakaatitat taamaattut soqutigineqarluarnissaat. Ullumikkut KNR radio-kut inunnik isumaginninneq, siunnersuinissamillu siunertalimmik aallakaatitsisarpoq (Aperilaarlanga) soqutigineqaqisumik, tamannalu annertusartariaqarpoq.

Illit qanoq isumaqarpit?

Larsi    

KNR imminut pigisoq - pitsaasuuvoq.

KNR ullumikkut erqumiiginarsinnaasumik suliffeqarfittut aaqqissuussaavoq, naalakkersuisoqarfiummi KIIIN-p ataani ’immikkoortoqarfipajaatut’ inissisimasutut oqatigineqarsinnaammat. KNR imminut pigisutut aaqqissuunneqartuuguni naatsorsueriaaserlu nutaaq atulerlugu, taava kisitsisinik, naatsorsuutinik, 'assilissamillu' sungiusimaneqarnerusumik takutititsisoqartalissagaluarpoq.

KNR-p ullumikkut aaqqisuussaanera akulikitsumik apeqquserqajaaneqartarpoq politikkerinut qanippallaartutut aammalu aningaasatigut taakkunaniit 'aqunneqarpallaartutut'. KNR-mi missingersuusiornissamut naatsorsueriaatsillu namminersornerullutik oqartussani atuuttut malittusavai. Peqqussutit aaliangersakkallu KNR-ip ingerlaneranut akuliunnerunngitsut, kisiannili ukiumiit ukiumut KNR-mut tapiissutaannarmik erqarsarnermik aallaaveqartut, silinnerusumillu erqarsarnermik aallaaveqanngitsoq. Soorlu KNR-ip nuna tamakkerlugu kiffartuussineranik qammarsaviuneranillu aallaaveqartumik erqarsarneq – assersuutigalugu ilinniartitaanerup peqqinnissaqarnerullu iluani, naalakkersuisoqarfiit suliffeqarfiillu sipporlugit erqarsarneq naaguna?

Erseqqissaatigissavarali naatsorsueriaatsit nutaat – soorlu årsregnskabslov malillugu - KNR-mi imminut pigisumi nutaami pitsaanerulernavianngimmata.

KNR-li imminut pigisumi erseqqinnerulersussaavoq arlaannanut attuumassuteqarani ingerlaneq, ingammik periuseq ’armslængdeprincip’ atoraanni (politikkerinut qanittuunngitsumik ingerlatseriaaseq). Taamaattumik KNR imminut pigisoq (selvejende institution) pitsaasuuvoq.

Illit qanoq isumaqarpit?

Larsi

Isumasioqatigiinnerup oqariartuutai arfineq marluk

Isumasioqatigiissitsineq immikkoortunut pingaarnernut arfineq-marlunnut eqikkarneqarsinnaavoq.

1.  TV-kkut aallakaatitassiat kalaallinut tunngasut kalaallinillu aallakaatitassiarineqartut amerlanerungaartut pillugit kissaateqarneq isumasioqatigiissitsinerup ingerlanerani sarfatut immap naqqatigoortutut ingerlaarpoq tamanillu oqaatigineqartarluni.  Isumasioqatigiissitsineq siullermik pingaarnermillu tv-kkut tusagassiuuteqarnermut tunngavoq, radioli tamatigut tamaana eqqaaneqartarluni.

2.  Innuttaasunik sullissineq tassaavoq isornartorsiuerpaluttumik tusagassiueriaaseq. Innuttaasunik sullissinermik oqariartaatsimi pingaarnerpaatut qitiutinneqartoq ilaatigut nutaarsiassanik isornartorsiuerpaluttumillu tusagassiueriaatsimik nassuiarneqartarpoq, ilaatigullu ataatsimoornermik pilersitsinertut, tamatumani KNR nunani tamalaani tusagassiuuteqarnikkut neqeroorutit amerlisinneqarnissaanni pingaarutilimmik inissisimalluni. KNR tassaavoq Kalaallit Nunaanni katersuuffittut tusagassiuuteqarnermi kultureqarnermilu sullissivik Kalaallit Nunaannut, Kalaallit Nunaat pillugu Kalaallit Nunaallu ilanngullugu sullissisoq. Tamanna piviusunngortinniassagaanni nunatta iluani avataanilu nutaamik eqqarsarnissaq Naalakkersuisunillu aningaasanik amerlanerusunik pissarsinissaq pisariaqarput.

3.    Oqaatsit. KNR kalaallit oqaasiisa pigiinnarnissaanni siammarsarnissaannilu pingaarutilimmik inissisimavoq. Taamatut inissisimaneq nukittorsarneqarariaqarpoq siunissaq ungasinnerusoq eqqarsaatigalugu oqaatsit pigiinnarneqassappata, tassami Alaskami assersuutissat ullumikkut imaammata, nunap inuiisa oqaasii kinguaariit tullissaanni tammartarlutik. KNR-imut aalajangiissuusumik unammilligassat ilaat aammattaaq tassaavoq marluinnik oqaaseqarfiusumik aallakaatitassiornermik sulineq. KNR innuttaasunut kalaallisuinnaq oqaluttunut tusagassiuutinik allanik toqqaanissaminnut periarfissaqanngitsunut immikkut pisussaaffeqarpoq. Tamatumali peqatigisaanik Kalaallit Nunaanni inuiaqatigiit marluinnik oqaaseqarfiupput, aammalu KNR-ip suliassaa tassaalluni oqaatsit taakkua marluit akornanni atassuteqaataanissaq.

4.    Suliarinnittussarsiuussinerit suleqatigiinnerlu: (STTK, Inuk Media, Nuuk tv, il.il.). KNR-ip aammalu Kalaallit Nunaanni tusagassiuuteqarnikkut suliffeqarfiit, sullissiveqarfiit (soorlu peqqinnissakkut ilinniartitaanikkullu suliassaqarfiit), najukkani tusaateqarfiit tv-qarfiillu kiisalu suliffimmik saniatigut ikiortaasartut aalakaatitassiortutullu suleqatit akornanni annertunerusumik suleqatigiinnissaq amerlaqisunit kissaatigineqarpoq. Tamanna suliaqartitat kontoannik pilersitsinikkut kiisalu aallakaatitassiat suliarineqartut avataaneersunit tunniunneqartussat annikitsumik procentilerneqartarnissaannik piumasaqarnikkut pisinnaavoq. Tamatuma saniatigut nunanik issittunik allanik kiisalu nunani avannarlerni radioqarfinnik tv-qarfinnillu suleqateqarnerunissaq kaammattuutigineqarpoq. Tamatumunnga peqatigitillugu aallakaatitassiani nuannariinnarlugu immiussat amerlarnerusut atorneqarnissaat pillugu pingaartumillu inuusuttut aallakaatitassiortarnissaat ilanngutassiortarnissaallu pillugit siunnersuutit saqqummerput.

5.    Piginnaasanik pitsanngorsaaneq sulisunillu isumaginninneq. Soorlu tusagassiortut isumasioqatigiissitsinermi peqataannginnerisa paasinarsisik-kaat suliffiup iluani sulinermi atukkat pitsaanerulersinnissaat pisariaqartinneqarpoq sulisut kaujumissaarneqarnissaat annertusarniassagaanni. Tamatumani pineqarput sulinermi atukkat, akissarsiat ilinniaqqinnissamullu periarfissat. Teknikkip nutaap atulersinneratigut ammalu arlalinnik tunngaveqarluni sulisinnaanerup pisariaqartinneqarnerani KNR-ip sulisuisa immikkut ittumik pitsanngorsaavigineqarnissaat pisariaqarpoq. Sulisussanik pissarsiniartarneq sulisullu pigiinnarnissaat pillugu ajornartorsiutit oqallisiginerannut atatillugu aammattaaq najugaq qimannagu tusagassiortunngorniarsinnaanermut periarfissaq piariaqartitsinerlu sivikitsumik eqqartorneqarput. 

6.    Radio aamma tv-p toqqorsivia. KNR-ip toqqorsivia kulturikkut oqaluttuari-saanermi assorsuaq pingaaruteqarpoq, Nunattalu Toqqorsivia KNR-imik suleqateqarusulluni. Lars Lennert-Sandgreen Naalakkersuisunut toqqorsi-viup isumannaarnissaanut aningaasanik pisariaqartinneqartunik toqqaannartumik qinnuteqarpoq.

7. Tusagassiuuteqarnermut ataatsimiititaliarsuarmik politikkikkut pilersitsineq aamma KNR-ip suliffeqarfittut ilusaanik nalileeqqinneq. Lars Lennert-Sandgreenip siunissami KNR-ip qanoq ineriartornissaa pillugu naalakkersui-sut tungaannit oqallinnissamut piumassuseqarneq maqaasivaa, Juaaka Lyberthillu taamatut kissaateqarneq erseqqissarpaa kaammattuutigalugulu Naalakkersuisut tusagassiuuteqarnermut ataatsimiititaliarsuarmik pilersitsis-sasut, siunissami innuttaasunik sullissinermut killiliussassanik erseqqissaa-sussamik. Naalakkersuisut tungaannit Arkalo Abelsenip kissaatigisap tamatuma Naalakkersuisunut ingerlatinnissaa neriorsuutigaa. KNR-imut takorluukkat erseqqissarnissaat siulersuisut suliassarigaat inersuarmit oqaaseqartoqarmat, siulersuisut namminneq aalajangiisarnissaat aamma aalajangersakkat sapinngisamik killilimmik politikkikkut sulialinnut tunniunneqartarnis-saat pillugu erseqqarinnerpaamik Kuupik Kleistip kaammattuutaani, KNR-ip tungaanit tusagassiuuteqarnermut ataatsimiititaliarsuarmik pilersitsinissamik politikkikkut aalajangernissaq erseqqissarneqarpoq. Tamatumunnga ilassutitut KNR-ip Namminersornerullutik Oqartussanut KIIIP-mullu atassuteqarnerata naliliivigeqqinnissaa kissaatigineqartutut oqaatigineqarpoq, aningaasaqarnikkut imarisamigullu nammineernerunissamik periarfissalimmik, ilaatigut KNR-ip nammineerluni sulisut suliaqarfiini tamani akissarsiatigut isumaqatigiinniarnernik ingerlatsisinnaalernissaanik kinguneqarsinnaasumik.

Qanoq illit isumaqarpit?

Inussiarnersumik,

Larsi

KNR seminar

Novemberimi KNR pillugu seminareqarnissaq pilersaarutaavoq. Tuluttut oqaaseq atorneqartuartoq 'public service'  kalaallisuunngortissimavarput 'kiffartuussineq, qaammarsaanerlu' qanormitaava illit paasiviuk? aamma KNR seminarerqarnissami suna pingaarnerpaatissagaluarpiuk erqartorneqarnissaa?

Ullut marluk seminarertoqarnisaa pilersaarutaavoq, sapaatilli akunneri arlallit sioqqullugu seminarernisami erqartorneqartussat sammineqarnerujumaarput. Illit naalaartartutut, isiginnaartartut, atuisutulluunniit qanoq isumaqarnerit saqqummersiguk. Imaassinnaavoq isumassarsiatsialammik erqarsalersitsisumik tunisisutit.   

Qanoq isumaqarpit?

Lars Lennert-Sandgreen 

Qaanaap lokalradioa ammaqqilli!

Piffissami kingullermi Qaanaami ajornartorsiutit tusagassiutitigut sammineqarput ilaatigut naalakkersuisunit aamma illoqarfik tikeraarneqarmat. Tusagassiutitigummi ajornartorsiutit annertunerusumik ilaatigut allaat torinngitsumik, sammineqaleraangata arlaatigut tupinnanngitsumik qisuariartoqartarpoq.

Ulluinnarnili Qaanaami pissutsit soorlu KNR-radiukkut nuna tamakkerlugu innuttaasut oqaatigiumasaat ajoraluartumik annertunerusumik tusarfigineq ajorpagut. Qaanaami lokalradio matusimasoq aamma tusarpara, qiimmaallaatigaarali massakkut nutaamik aallartisarnissaa suliniutigineqalersaarmat.

KNR-miit kissaatigeqaarput Qaanaami lokalradio ammarqinneqarumaartoq, tamaasiorneratigummi KNR-miit suleqataanissarput piareersimaffigissavarput pisussaaffitsitummi kiffartuussinerup qaammarsaanerullu aqqani aamma tamanna isigigakku.

Piviusunngortikkusunnaraluaqaaq soorlu sapaatillunniit akunneranut 1 tiime Qaanaap lokalradiua nutaaq Kalaallit Nunaata Radiua aqqutigalugu, nutaarsiassanik assigiinngitsunik avannaarsuani inuuniarneq pillugu, suliniutillu sumut qilliffeqarnersut, tusagaqartitsinissaq. Soorlu sinerissami lokalradiut allat taamatut suleqatigigigut. Soorunami tamanna qujanassagaluaqaaq Qaanaami nunatsinnilu innuttaasunut sullissineq pissusissamisoortoq, torersoq, iluaqutaasorlu.

Qaanaami innuttaasut ulluinnarni assigiinngitsutigut atugaat pillugit, Kalaallit Nunaata Radiuatigut periarfissikkumavagut nammineq oqaatsitik atorlugit oqariartuuteqartuartarnissaat, pisunik pingaaruteqartunik erqartueqatiginissaat, saqqumilaarqatiginissaat, qanilaaqatigalugit, innuttaaqatitullu ilisareqatigiinnerunissaq.

Qanoq isumaqarpit?

Inussiarnersumik,

Lars Lennert-Sandgreen