webloggi

Qaanaap lokalradioa ammaqqilli!

Piffissami kingullermi Qaanaami ajornartorsiutit tusagassiutitigut sammineqarput ilaatigut naalakkersuisunit aamma illoqarfik tikeraarneqarmat. Tusagassiutitigummi ajornartorsiutit annertunerusumik ilaatigut allaat torinngitsumik, sammineqaleraangata arlaatigut tupinnanngitsumik qisuariartoqartarpoq.

Ulluinnarnili Qaanaami pissutsit soorlu KNR-radiukkut nuna tamakkerlugu innuttaasut oqaatigiumasaat ajoraluartumik annertunerusumik tusarfigineq ajorpagut. Qaanaami lokalradio matusimasoq aamma tusarpara, qiimmaallaatigaarali massakkut nutaamik aallartisarnissaa suliniutigineqalersaarmat.

KNR-miit kissaatigeqaarput Qaanaami lokalradio ammarqinneqarumaartoq, tamaasiorneratigummi KNR-miit suleqataanissarput piareersimaffigissavarput pisussaaffitsitummi kiffartuussinerup qaammarsaanerullu aqqani aamma tamanna isigigakku.

Piviusunngortikkusunnaraluaqaaq soorlu sapaatillunniit akunneranut 1 tiime Qaanaap lokalradiua nutaaq Kalaallit Nunaata Radiua aqqutigalugu, nutaarsiassanik assigiinngitsunik avannaarsuani inuuniarneq pillugu, suliniutillu sumut qilliffeqarnersut, tusagaqartitsinissaq. Soorlu sinerissami lokalradiut allat taamatut suleqatigigigut. Soorunami tamanna qujanassagaluaqaaq Qaanaami nunatsinnilu innuttaasunut sullissineq pissusissamisoortoq, torersoq, iluaqutaasorlu.

Qaanaami innuttaasut ulluinnarni assigiinngitsutigut atugaat pillugit, Kalaallit Nunaata Radiuatigut periarfissikkumavagut nammineq oqaatsitik atorlugit oqariartuuteqartuartarnissaat, pisunik pingaaruteqartunik erqartueqatiginissaat, saqqumilaarqatiginissaat, qanilaaqatigalugit, innuttaaqatitullu ilisareqatigiinnerunissaq.

Qanoq isumaqarpit?

Inussiarnersumik,

Lars Lennert-Sandgreen

Tallimanngorneq 18. maj 2007

KNR-mut ulloq immikkooruteqarpoq pingaaruteqarlunilu. Kiisami allakaatitassioriaatsimut aallakatitseriaatsimullu nutaaliaasumut digitaliusumut ikaarsaarpugut. Isumatuut ilaat oqarnikuuvoq iluatsiffiit nalilertinnagu suna annaasariaqarsimanerlugu naliliinernut toqqammavigiuk. Erqarsaatigilaaraanni KNR-mi tamatta tulluusimaartariaqarsoraanga ullumikkut angusatsinnut. Atortut nutaanngilisimaqisut qimallugit nutaaliat atulerpagut, nutaamik eqaatsumik aallakaatitassioriaatsimik periarfissiisut, atortutoqqatta tunniussinnaanngisaat. Aap – atortutoqqanut nutaanngitsunut qujavugut. Naluara maqaasineqassanersut taamaassimanngippallu iluatsitsinerput annertuvoq.

Ullumikkut Qanoruumi sulisut qutsateqaakka, ukiorpassuarnimi taakku ilungersunartumik atugaqarlutik tv-kut pisariaqarteqisatsinnik nutaarsiassaqartinniartarsimammatigut, atortutoqqat nutaanngilisut atornerisigut. Immikkut Qanoruumi tusagasiortut, teknikerit nutserisullu qujaffigerusuppakka ullumikkumut qilliffitsunnut ilungersoqataasimammata. Pilluangaaritsi nutaalianik atortutaarnissinnik. Qanortoq ulluinnarsi oqiligili.

Tv-ku-mi sulisut aamma nutaalianik atortutaarput. Tv-kut aallakaatitat takusallu ullutsinni nunatsinni aamma nukittoorujussuanngornikuupput. Ingammik innuttaasunut tamanut tv-kut kiffartuussinerup aqqani saaffiginnissutit.

Tusagassiornertigut, aallakaatitassiornertigut, aallakaatitsinerullu nunatsinni siunissami periarfissarpassuarnik imaqarpoq, sulisuttalu piginnasaat tassani kisimik killiliisutullisooq inissisimapput.

Siunissami mediaqarnerup silarsuaani pissanganartopassuaqarlunilu mianersorfissaqartorujussuuvoq, tassami illuatungaani nunarsuatsinniit aatsaat taamak periarfissanik nutaanik pisariaqartitsitigaagut, illuatungaatigullu mianernarluinnarluni nunarsuarmi suliffeqarferujussuit mediaqarnertigut aningaasaatilissuit, aatsaat taamak nunatsinni tusagassiorneq, inuiaqatigiinni oqalliseriaaserput, nunatsinni kulturikkut eriagisassatut kingornussagut, oqaatsigut nipilersornertigut erinarsornertigullu immikkuussuserput, ulorianartorsiortimmassuk. Taamattumik aatsaat taamak pisariaqalernikuutigivoq tamakku tungaatigut kingusinanngitsumik ’inortuisigata’ nukitsorsarlutalu nalimmassarnissarput. Aatsaat taamak pisariaqalernikuutigaaq KNR-mi nunatsinneersunik kalaallit nunaamiunut isumalinnik, pisariaqartinneqartunik qanilaartitsisunillu radiukkut, tv-kut Internet-ikkullu aallakatitassiornerulernissaq.

Pilluaritsi!

Inussiarnersumik

Lars Lennert-Sandgreen

Ulluinnarni inuunermi toqqammaviunerusut qanilaartitsinerunerlu

Ullutsinni aatsaat taamak inuttut misigissutsitigut, isaasalerlugu ’nasiffissaaleqilernikuutigaagut’ tamakkiinerusumillu paasinniffiusumik isiginnikkusulernikuutigaagut. Takusat, tusakkat piviusut sukkaqisumik ilaatigut paasiuminaassinnaasumik qulaatiinnarlutalusooq ingerlapput, soorlu qaqqarsuup innermik anitsisartup aamarsua unitsitassaanngivilluni ipititsigaluttuarluni ingerlaartoq.

Ullumikkut tusagassiorfitsigut assilissami assigiinngeqisumi inissisimanitsinni, aatsaat taamak nuna tamakkerlugu tusagassiorfik inuiaqatigiinnut tamanut paasissutissatigut kiffartuussilluarlunilu qaammarsaasoq, pisariaqartitsigaarput. Kinaassuseq sumiuussuserlu sukkavallaamik maluginngisatsinnik tammariartorput. Ilaatigut kanaalerpassuit, aliikkusersuinerit, allatigullu aallakaatitat nipit, assit avatitsinneersut uagutsinnut kimeqanngiusartut oqariartuutitaqanngitsullu, pisimasuiunngitsut timitaqanngitsullu, kiisa ulluinnarilernikuuvagut, aaliuna ulluinnarni inuunitsinni annertoqqutissatut, ilisareqatigiinnissatut, qungujulaarfissatut, illaqatigiilaarfissatut, nukittorsaatitullu nunatsinneersut aliikkusersuisartut, isiginnaartitsisartut, aallakaatitassiorsinnaasut pigeriikkagut, aallerfigisussaagaluarigut. Ilami ilaanni ipilersutut misigisimanartarmat.

Taamaattumik ullumikkut nunatsinni teknikkitigut ineriartorfioqisumi pingaaruteqarluinnarpoq siullertut paasissallugu nalileqqissallugulu, qanoq pingaaruteqartigisoq inuiattut, kulturikkullu kinaassuseqartitsinerusumik nukittorsaaviusumillu peqartuarnissaq.

Suliassaq akisussaaffilersugaq ilusiligarlu Kalaallit Nunaata Radioani qangali tigummivarput, tigummiussallugulu. Ullumikkut atortut digitalinngoriartorfiani aamma piareersimavugut, naalaartartutsinnut isiginnaartartutsinnullu ulluinnarni inuunermi toqqammaviunerusut suli annertunerusumik pingaartinnerullugit qanilaartitsinerunissatsinnut.

Inussiarnersumik

Lars Lennert-Sandgreen

KNR-ip tusagasseeriaasia apeqquserniarneqassanngilaq

KNR-ip arlaannaanut attuumassuteqanngitsumik, illersuinngitsumik, isornartorsiortumillu tusagasseeriaasaa apeqquserniarneqassanngilaq.

KNR-mi pisortaalluta tupigusuutigisimaqaarput Sermitsiaq allaaserisamini radioaviisip nutaarsiasseeriaasaa apeqquserniarsaralugulusooq allaatigimmagu.

Taamatut allaatiginninneq immini ajoquteqanngilaq, nunatsinnimi kinaluunniit grundlov-itigut illersugaasumik kiffaanngissuseqarluni isummersinnaatitaammat. Kisianni kialluunniit Sermitsiami aviisiliortup allaatigisaa tunuliaqutaralugu nalornileqqunagu, erseqqissaatigissavara KNR-ip tusagasseeriaasaanut toqqammaviusut minnerpaamilluunniit apeqquserniarsarineqassanngimmata. Tusagasseeriaatsit tungaatigut periutsit minnerpaamilluunniit nutaartaqanngillat, soorlu taamak Sermitsiap iluseqartinniarsarisaatuut. KNR inatsisartut peqqussutaat naapertorlugu ingerlavoq, soorlu aamma sulisut aallakaatitassiornermut tusagassiornermullu ileqqorissaarnissamut illup iluani maleruagassat toqqammavigalugit sulisut.

KNR kalaallit nunaata arlaannaannut politikkitigut aningaasatigullu attuumassuteqanngitsumik tusagassiiviuvoq, tusagassiorfiullu nutaarsiassiinertigut sulisullu sulinerisigut innarliutaanngitsumik suleriaaseqartuarnissaat, nalornissutigineqanngisaannassaaq. KNR tamatigoortuunermigut kikkunnut tamanut, isummersuutinullu tamanut periarfissiiuassaaq, arlaannaanullu attuumassuteqarani isornartorsiorpaluttumik tusagasseeriaaseqartuassalluni.

Inussiarnersumik

Lars Lennert-Sandgreen