Novemberimi KNR pillugu seminareqarnissaq pilersaarutaavoq. Tuluttut oqaaseq atorneqartuartoq 'public service' kalaallisuunngortissimavarput 'kiffartuussineq, qaammarsaanerlu' qanormitaava illit paasiviuk? aamma KNR seminarerqarnissami suna pingaarnerpaatissagaluarpiuk erqartorneqarnissaa?
Ullut marluk seminarertoqarnisaa pilersaarutaavoq, sapaatilli akunneri arlallit sioqqullugu seminarernisami erqartorneqartussat sammineqarnerujumaarput. Illit naalaartartutut, isiginnaartartut, atuisutulluunniit qanoq isumaqarnerit saqqummersiguk. Imaassinnaavoq isumassarsiatsialammik erqarsalersitsisumik tunisisutit.
Qanoq isumaqarpit?
Lars Lennert-Sandgreen
Inuugujoq pisortaq. Erseqqissaqqaassavara uanga namminiussusera tunngavigalugu manna isummernerigakku.
Tusagassiutit inuiaqatigiinnut kiffartuussisussaatitaanerannik paasinnittarnera malillugu, KNR tassaasariaqarpoq inuiaqatigiinni equngasunik qaammarsartariaqakkanillu malinnaasussaq 'suaartartussarlu'.
Siullermik radio:
Malinnaajuartuunera aallaavigalugu isumaqarpunga, radiokkut oqaluttuartitsiinnarnerit amerlavallaartut, illuatungaatigullu qaammarsaaniutit ikippallallaarlutik. Isumaqarpunga, inuiaqatigiinni pisartut - sorpassuusinnaapput - sukumiinerusumik malinnaaffigineqartarnissaat KNR-imit eqiingaffigineqarnerulertariaqartoq. Pisartunut tunuliaqutaasut sukumiinerusumik itisilertarlugit tusagassiortunit sammineqarnerusariaqarput, paasissutissatut qaammarsaaniutitullu tusagassiarineqartarlutik. Paasissutissiiginnarani aammali pisartunik (ajortussarsiunngikkaluarluni) apeqqusiisinnaaneq isornarsinnaasunullu ujartuisarnissaq tusagassiortut ingerlannerusariaqarpaat, inuiaqatigiinnimi pisartuni equngasorpassuarnik uparuartarialinnillu nassaassaqartuarpoq, qaqilerneqarlutik erseqqissumik paasissutissiiffigineqanngikkaangamik inuit akornanni nalinginnaq oqallisaalertartut. KNR-ip tamanna malinnaaffigiuartuaruniuk isumaqarpunga kiffartuussisussaatitaanermik qaammarsaanermillu pisussaaffik ingerlannerulersinnaagaa.
Suli radio:
Nunarput namminersulerumaartoq ukiuni makkunani taannarineqarpoq oqallisaajuarlunilu. Uangaana eqqarsaatigillualeraangakku tupigisariga inuiaqatigiit anguniagaat taamak pingaaruteqartigisoq anguniarneqartillugu tusagassiutitigut (radiokkulluunniit) oqallinnermik ataavarnerusumik KNR ingerlataqanngimmat. Inuiaqatigiinni oqallisissaqartuassaagut namminersulivikkaluaruttaluunniit, isumaqarpungalu oqallinneq uummaarissumik tatiginartumillu ingerlanneqarsinnaagaluartoq, soorunami illuatungeriittarneq oqimaaqatigiissillugit sammineqartarlutik. Politikeriinnaanngitsut, aammali inuiaqatigiinni atorfillit qanillinerullugit oqallinneq malunnaateqarnerulersittariaqarpoq, inuiaqatigiittut namminersortutut ingerlalissagutta oqallinneq uummaarissuujuartariaqarmat.
Isumaqartungaana KNR radiop pingaarutaa aamma tassaniittoq: Nunarput isorartoqimmat inoqarfiillu imminnut taamak ungasitsigimmata radio tassaasoq inuiaqatigiit malinnaatinneqarnissaannut sakkussat pitsaanersaat.
TV pillugu:
Inuiaat ikittunnguugatta tupinnanngitsumik TV-iikkut aallakaatitassiortarnerup ineriartortinniarnera arriippoq. Inuiaqatigiinnili ilinniarsimassutsikkut angusaqanngitsoortartut qiviassagaanni, isumaqarpunga KNR inuusuttunut sassartaarnerulluni pilerisaarinermik ingerlatsilertariaqartoq. Tusagassiortutut, teknikeritut allatulluunniit tusagassiuteqarnerup silarsuaani ilinniagaqarnissamut sulinissamullu inuusuttunik kajumissaarineq annertunerulertariaqarpoq taamaaliornikkut siunissami sulisorineqarsinnaajumaartussat amerlanerit pilerisutsinneqalersinnaagaluarmata.
Oqaatsigut nammineq atorlugit ullumikkut TV-iikkut aallakaatitassiortarneq suli ineriartortitassarujussuuvoq, massakkummi malunnarpoq aallakaatitassiortartut suliaminnut siunnersorneqarnissartik assut amigaatigisaraat. TV takusassaqarfiullunilu tusarnaagassaqarfiummat, assilissatigut oqaluttualioriaaseq sukumiinerusumik aallakaatitassiortartut pikkorissarfigiuartariaqarpaat, taamaalioraanni takutitassat suli pitsanngoriartornissaat anguneqaleriartorsinnaammat.
Qanorooq:
Qanorooq inuiaqatigiit pinngitsoorsinnaajunnaareerparput, isumaqarpungalu Qanorooq nutartinngippallaarlunilu ineriartunngippallaartoq. Soorlu ukiaq manna aallarteqqikkami allanngungaarsimanngilaq.
Nalunngilara tusagassiortussaaleqineq ajornartorsiutigineqartartoq. Taamaakkaluartorli sulisutoqqat ilaat ukiorpanni tassaneereersut nutartertuarnissamut ineriartornissamullu periarfissaqarsinnaagaluarput, taamaalillunimi Qanorooq soqutiginarsartuarneqarsinnaagaluarmat.
Taanngitsoorusunngilakka Qanoruumi sammineqartartut, isumaqarpungami oqaluttualiarineqartartut amerlavallaat soqutaanngippallaartut. Ilanngutassiat amerlanersaat oqaluttuaannarnerusarput inuiaqatigiit ingerlanerannut innuttaasunut soqutiginaatilimmik attuisaratik.
Qanorooq isiginnaarumaneqartaqigami inuiaqatigiinni equngasunut isornartunullu sammiveqarnerusariaqarpoq, nutaarsiassalerinerup pingaarutaa tassaagami inuiaqatigiinnut oqimaaqatigiissumik paasissutissiisarnissaq. Soorunami oqaluttuat nuannersoqalaartarnissaat pingaaruteqarpoq, inuiaqatigiilli innuttaat eqqarsalersinneqarlutillu isummernissaannut periarfissaqartinneqartassappata, nutaarsiassaqartitsivik tassaasariaqarpoq inuiaqatigiinni pisunik sunilluunniit samminnissinnaasariaqartoq.
Isummersuutigiumasakka ilassaqaraluaqaat - aammami aliikkutassaqartitsinermut tunngasut uani ilanngutinnginnakkit - naggataatigulli siunnersuiinnarumavunga:
KNR tassaalerli:
* inuiaqatigiinnik malinnaalluartoq, pisartunik sukumiisumik arajutsiuitsumillu tusagassiisartoq.
* Isornartunik ujartuisoq illuatungiliisinnaasorlu.
* Oqimaaqatigiissumik illuatungeriittarnermullu ataqqinnittumik tusagassiisartoq.
Inuulluaqqusillunga
Ole PL Petersen
Sisimiut
Posted by: Ole PL Petersen | 09-09-07 at 11:32
Haluu Ole,
Kingusilaaraluartumik allagarnut qujanaq. Tikkuartukkatit tamarmik pingaaruteqarput isumasioqatigiinnissamilu qularutissaanngilaq taakkartorneqarumaartut. Tusagasiornertigut KNR-milu ulluinnarni nutaarsiassiineq, qaammarsaaneq, kiffartuussinerlu suliaralugu ilaanni erqarsartarpunga sutigut ingerlariaqqinnavianngitsugut KNR-mi suliassat qitiusut erqartukkatit soorlu nukittorsarneqanngippata. Ullumikkut isumasioqatigiinnissaq neriulluarfigaarput aallaavigalugu erqarsaatinik nutaanik aamma isummersorfiujumaartoq neriulluarpugullu politikkeriiinnaanngitsoq, kisianni aamma ulluinnarni atuisut, naalaartartut isiginnaartartut oqallitsitsilerutta saqqumilaarluarumaartut. Ilaatigummi misigisimanartarmat kisitta isumalluutaalersimalluta KNR-mi sullissimiarmitsinni imaluunniit kiffartuussiniarnitsinni. KNR sanngiitsoq isumaqarpoq inuiaqatigiit sanngiitsut ataatsimut isigaluguy. Oqaatsit tammariartorput nutaarsiassat itisilerneqassaarput, meeqqat inuusuttullu tv-kut radiukkullu peroriartornerminni takusassaat tusarnaagassaallu annikingaarmata soqutigineqarpianngillat. 'Inuuneq Peqqissoq' tv-kut aallakaatissiaq pilluta pilluta aallartipparput - nakorsat ilaatigut ikiorsiunniarsaralugit kisianni soqutigineqanngilagut saqqummerusuttoqanngimmat. Aaliuna inuiaat annertoorujussuarmik pisariaqartikkaluaraat inuunermik peqqinnerusumik inuunissamut siunnersorneqalaarnissaminnut qaammarsarneqalaarnissamullu. Ila tupinnaqaaq taannaannarluunniit oqatussaanerusunik soqutigineqannginnerujussua. Meeqqerisut ilaatigut KNR nittartagaatigut oqallittut ilaatigut neriuutaarullutik isummersortut erqarsariarnartaqaat. Tusagassiornertigut KNR nukittorsarneqanngippat unittoornerup kingunerisaanik nukissaarukkiartortussaavugut. Tusagassiortuugavit takunnissinnaanerit pingaarutilinnik qujavunga. Taamak isummersortoqartillugu suli neriuutissaqarnerput takusinnaagakku. Tusagassiortut kalaallisut oqaasillit annertuumik KNR-mi amigaatigaagut. Aliikkusersuineq pisariarteqaarput - atagu qamannga pisumik illalaartali - asuli qungukunnertaqalaanngitsumilluunnit aliikkusersuiniarsarinata. Tissisaarillaqqinnerpaanik peqaraluarpugut tarnikkut timikkullu 'nakorsaatissatsinnik'.
Tassunga killikkallarpunga neriulluarpungalu isumasioqatigiinneq sioqqullugu radiukkut tv-kullu oqallitsitsilerutta tamakku erqartukkatit / erqartukkagut sammilluarneqarumaartut. Taamatummi pilersaarpugut.
Ajunngikkina aamma illit inuugujoq!
Larsi
Posted by: Lars Lennert-Sandgreen | 25-09-07 at 23:36
Robert E. Peary aamma OVL OVLUSE-ip tv-kut qallunaatut allagartalersuisarneq pillugu isummersuutaat isumaqatigingaarpakka aamma tamanna ilungersorluta anguniarsarisaraluarparput. Kisianni ajoraluartumik qulliunerusunit tamanna 'orniginartinneqanngilaq' ilumooramimi soorlu nunatsinni tv-kut isiginnaarut nalilersoraanni oqaatsisigut nikingasoqartorujusuuvoq, KNR-milu aningaasarpassuit Qanoruup ullut tamaasa nutsernisaanut allagartalersornisaanullu atortarpagut. Robert ilumoorluinnarami nutserisut nunanit allaniit aallakaatitassianut nutsernissaanut atortussaagaluarpagut inuiaqatigiillu pitsaanerusumik taamatut sullillugit.
inussiarnersumik
Larsi
Posted by: Lars Lennert-Sandgreen | 05-10-07 at 15:47